Erakundeen soziologia

Galder Guenaga Garai. Bilboko Enpresa Eskolako irakaslea. Industria Ekonomia Saila. Miguel González Simón. Bilboko Enpresa Eskolako irakaslea. Industria Ekonomia Saila. Helbide elektronikoa: galder.guenaga@ehu.es Telefonoa: 946014766

Lan honen helburua da edozein erakundetan gertatzen diren fenomeno soziologiko nagusiak definitzea eta aztertzea. Eta, erakundeen zakuan, arreta berezia eskainiko diegu helburu ekonomikoa dutenei, hots, enpresei. Hartara, lan honetan Soziologiak, Ekonomiak eta Enpresa Zientziek ematen dizkiguten ikuspegiak gurutzatuko eta baliatuko ditugu giza eta gizarte harremanak deskribatzeko.

Horrela, aztergai izango ditugu erakundeen baitako eta kanpoko giza eta gizarte harremanak, erakundeen antolamendu formala eta informala, laneko parte-hartzea eta alienazioa. Halaber, bereizi eta biluztu egingo ditugu erakunde barruko rolak (zuzendaria, teknikaria, langilea, enpresaburua). Eta, azkenik, lidergoaren kontzeptua arakatuko dugu: lidergoaren oinarriak, jatorria, taktikak, dimentsioak... miatuko ditugu; eta bereziki aintzat hartuko dugu liderrek duten zeresana eta zeregina hala kapital intelektuala nola kapital emozionala kudeatzen eta sustatzen. Eta horretarako, PowerPoint programan funtsatutako material dinamiko, koloretsu eta jostagarria erabiliko dugu.

Ikasmaterial hau bete-betean dagokio Negozioen Kudeaketako Graduko "Erakundeen Soziologia" irakasgaiari. Baina erabilgarria izan daiteke, ezbairik gabe, EHUn bertan beste hainbat ikastegitan eta titulaziotan diharduten ikasle eta irakasleentzat ere: Lan Harreman eta Giza Baliabideetako Gradukoentzat, Enpresa Administrazio eta Zuzendaritzako Gradukoentzat, Soziologiako Gradukoentzat, eta abarrentzat.

Gainera, esan dezagun ikasmateriala ez ezik, irakasmateriala ere badela (bereziki, gainera). Hots, ikasleentzat ez ezik, irakasleentzat ere baliagarria da. Izan ere, PowerPoint programak aukera ezin hobea ematen du pedagogiaren mesedetan koloreak, mugimenduak, grafikoak, argazkiak, Interneteko estekak eta enparauak txertatzeko, ikasleen eta bereziki irakasleen lana erraztuz eta eraginkorragoa bihurtuz.

Gainera, edukiak edonork eskuratu, ordenagailuan gorde eta nahi eran erabili ahalko ditu, baita aldaketak edota zuzenketak egin ere, edo atal berriak gehitu, datuak eguneratu, ariketa gehiago txertatu, esteka gehiago erantsi, etab. Horregatik, tresna moldagarri eta dinamikoa dela deritzogu.

Lan honek, 3 ataletan bilduta, 16 gai jorratzen ditu, beste horrenbeste PowerPoint agiriren bidez eta bakoitzari 30 diapositiba inguru eskainita:

LEHEN ATALA: ERAKUNDEA ETA PARTE-HARTZEA
1. gaia. Erakundeen soziologiarako sarrera
2. gaia. Enpresaren antolakunde formala
3. gaia. Alienazioa lanean
4. gaia. Antolakunde formala eta nortasuna
5. gaia. Parte-hartzea
BIGARREN ATALA: ERAKUNDE BARRUKO ROLAK
6. gaia. Zuzendari-rola
7. gaia. Langile-rola
8. gaia. Teknikari-rola
9. gaia. Enpresaburu-rola
HIRUGARREN ATALA: LIDERGOA ERAKUNDEETAN
10. gaia. Lidergoa eta boterea
11. gaia. Liderraren taktikak lankideak limurtzeko
12. gaia. Lidergorako potentzialaren oinarriak eta jatorria
13. gaia. Lidergoaren dimentsio funtsezkoak
14. gaia. Lidergoa, ingurune aldakorraren aurrean
15. gaia. Lidergoa eta kapital intelektuala
16. gaia. Lidergoa eta kapital emozionala