Makroekonomiarekin jolasean

Galder Guenaga Garai galder.guenaga@ehu.es, Bilboko Enpresa Eskolako irakaslea

Goizalde Hernando Saratxaga

Saila: Industria Ekonomia

Telefonoa: 946014711

Segundo Vicente Ramos

Lan honen helburua makroekonomiaren kontzeptu, tresna eta politika nagusiak azaltzea eta haiekin jolastea da, hots, PowerPoint programa lagun dugula modu jostagarrian zientzia makroekonomikoaren oinarriez jabetzea: aldagai makroekonomiko garrantzitsuenak (kontsumoa, aurrezkia, inbertsioa, gastu publikoa, esportazioak, inportazioak, barne produktu gordina, etab.) deskribatu eta elkarren arteko loturak azaltzen ditugu, zerga-politikaz eta diru-politikaz ari gara, langabezia eta inflazioari buruzko ideia orokorrak aurkezten zaizkigu, etab. Horretarako, PowerPoint programan funtsatutako material dinamiko, koloretsu eta jostagarria darabilgu. Edukiari dagokionez, Galder Guenaga irakasleak egindako eta EHUk sarean argitaratutako Makroekonomiarako sarrera (ISBN: 978-84-692-1784-9) ikasmateriala hartu dugu oinarri.

Ikasmateriala izateaz gain, irakasmateriala ere bada (bereziki, gainera). Horregatik, ikasleentzat ez ezik, irakasleentzat ere baliagarria da. Izan ere, PowerPoint programak aukera ezin hobea ematen du didaktikaren mesedetan koloreak, mugimenduak, doinuak eta enparauak txertatzeko, ikasleen eta bereziki irakasleen lana erraztuz eta eraginkorragoa bihurtuz. PowerPoint biziki aproposa da ekonomia zientzian horren erabilgarriak eta garrantzitsuak diren grafikoak urratsez urrats irudikatzeko eta kurben mugimenduak azaltzeko; baita ariketak pausoz pauso planteatu eta ebazteko ere. Gainera, edukiak edonork eskuratu, ordenagailuan gorde eta nahi eran erabili ahalko ditu, baita aldaketak edota zuzenketak egin ere, edo atal berriak gehitu, datuak eguneratu, ariketa gehiago txertatu, etab.

Lan honek 8 gai jorratzen ditu, beste horrenbeste PowerPoint agiriren bidez eta bakoitzari 40 diapositiba inguru eskainita:

• 1. gaian makroekonomiaren ikuspegi orokorra ematen da (kontzeptua, jatorria, helburua, politikak).
• 2. gaia herrialde bateko produkzio eta errentaren neurketari eskaintzen zaio, bereziki barne produktu gordina (BPG) zer den eta nola kalkulatzen den erakutsiz.
• 3. gaian, eredu keynestarrean oinarrituta, ekonomia itxi batean BPGa nola zehazten den bistaratzen dugu, familien kontsumoa eta enpresen inbertsioa kontuan hartuta.
• 4. gaian gure ekonomia atzerrira irekitzen dugu, esportazioei eta inportazioei lekua utziz, eta gobernuak zerga-politika nola darabilen azaltzen zaigu.
• 5. gaian dirua zer den eta zertarako den aurkezten dugu.
• 6. gaian Banku Zentralak diru-politika nola eta zertarako darabilen aztertzen da.
• 7. gaian eskari agregatua eta eskaintza agregatua darabiltzagu herrialde baten egoera ekonomikoa aztertzeko, gorabehera ekonomikoen iturburua azaltzeko eta politika eraginkorrenak proposatzeko.
• 8. gaian erakusten dugu langabezia eta inflazioa zer diren, nola neur daitezkeen, zein kalte dakarten eta nola egin diezaiekegun aurre.