Nuria Galende Pérez, Marta Ferrero González eta Priscila Comino González

Proposamen honen helburu nagusia da ikerketan oinarritutako ikaskuntzaren metodologiaren bitartez (EHUk proposatzen duen IKDi³ ereduari jarraituz) eta talde-lanean arituz, Garapenaren Psikologia Eskola Adinean irakasgaiko ikasleek jakintza-arlo horretako ikerketa zientifikoarekin lehen harremana izatea eta ebidentzia zientifikoaren erabilera, ulermena, analisia eta hausnarketa lantzea.

Helburu orokor hori hiru helburu zehatzetan banatzen da:

• HZ1: Metodo zientifikoari eta, zehazki, Garapenaren Psikologiaren arloan duen erabilerari buruzko oinarrizko ezagutza orokorra eraikitzea.
• HZ2: Ezagutza-arlo honetan haurrekin egindako ikerketak bilatzeko, irakurtzeko, ulertzeko eta kritikoki aztertzeko beharrezkoak diren erremintak garatzea.
• HZ3: Funtsik gabeko ideien eta babes zientifikoa duten ideien artean bereiztearen garrantziaz jabetzea.
• HZ4: Ebidentzia zientifikoa Haur Hezkuntzako hezkuntza-praktikekin lotzea.

Testua bereziki Haur Hezkuntzako Graduko ikasleei zuzenduta dago eta gradu horretan lantzen den Garapenaren Psikologia Eskola Adinean izeneko irakasgaian zentratzen da. Horregatik, testu osoan zehar jarriko diren adibideek lotura estua izango dute irakasgai horretako eta graduko edukiekin.

Hala ere, eta egin beharreko doikuntzak eginez gero, proposamenaren eduki gehienak erraz egokitu daitezke Lehen Hezkuntzako Gradura, zeinean irakasgai hau ere ematen baita. Modu berean, ñabardura txikiekin, Garapenaren Psikologia lantzen duten beste gradu batzuetara (Gizarte Hezkuntza, Gizarte Lana, Psikologia…) edo hemen aurkezten diren gaiekin zerikusirik ez duten beste gradu batzuetara ere molda daiteke.

Gorago aipatutako helburuak lantzeko, guztira lau jarduera proposatzen dira, irakasgaia ematen den lauhilekoan zehar ikasgelan landu ahal direnak. Jarduerak zailtasunaren arabera goranzko norabidean planteatzen dira.

Lanaren hasieran sarrera bat aurkeztuko da (1. kapitulua) eta, horren ostean, aipatutako lau jarduera horietako bakoitza (dagozkion helburu, urrats, ebaluazio-irizpide eta bestelako edukiekin batera) hurrengo kapituluetan aurkeztuko da.

1. jarduera, «Ikerketa-eremuan murgiltzen»: 2. kapitulua. 
2. jarduera, «Bilaketa bibliografikoak egiten ikasten»: 3. kapitulua. 
3. jarduera, «Garapenaren Psikologiari buruzko ikerketa-artikuluak»: 4. kapitulua. 
4. jarduera, «Mitoa ala errealitatea?»: 5. kapitulua. 

Sarrera eta lau jarduerek osatzen dituzten bost kapituluen ostean, irakurleak proposamen hau ikasgelan praktikan jarri nahi duenarentzat lagungarri izan daitezkeen hainbat eranskin topatuko ditu.