Euskal ikus-entzunezko sistema: euskarazko zinemaren finantzaketa eta produkzioa ulertzeko gidaliburua

MIREN MANIAS MUÑOZ Komunikazio eta Gizarte Zientzien Fakultateko ikertzailea da.

Gidaliburu honen helburua da azken urteetan estreinatutako euskarazko filmen finantzaketa eta produkzio-baldintzak azaltzea. Horretarako, kultura-adierazpenen gaineko teoriak aztertzen dira lehendabizi; ikuspegi sozialetik eta ekonomikotik, hain zuzen ere. Ondotik, zinema-jardueraren testuinguru orokorra jasotzen da; film luze bat egiteko prozesuaren nondik norakoak zehazteko asmoz.

Hego Euskal Herriko testuinguruan sartu aurretik, Europar Batasuneko ikus-entzunezkoen egoera eta arautegia azaltzen dira. Filmen produkzioa, banaketa eta kontsumo-joerak ulertu ahal izateko, legegintza-tresnak eta sustapen-programak laburbiltzen dira. Horren ondotik, Espainiako markoa aztertzen da. Zehazki, euskal zinemari aplikatu beharreko arautegia eta ikus-entzunezkoen sustapen-sistema.

Azkenik, euskal zinemaren testuinguruan jartzen da arreta. Hain justu, azken urteetako euskarazko filmen oinarri ekonomikoak ulertu ahal izateko.

Lan honen edukia euskal ikus-entzunezko sektorean interesa duen edonorentzat zuzenduta dago. Bereziki, azken urteetan ekoitzitako euskarazko zinemaren finantzaketa eta produkzio-baldintzak ezagutu nahi dituenarentzat.

• Kultura-industrien gaineko hurbilketa teorikoen laburpena.
• Europako zinemaren arautegia eta sustapen-programak; produkzio-, banaketa- eta kontsumo-joerak.
• Euskal zinemaren diru-laguntza sistema.
• Euskarazko zinemaren finantzaketa eta produkzio-baldintzak.
• Ondorioak.